ANG UNANG POSTMASTER NG MARIVELES

Si Genaro Villalobos Pacquing ay isinilang noong January 10, 1885, sa bayan ng Candon, Ilocos Sur. Sa murang edad, nilisan niya ang kanyang sinilangang bayan upang humanap ng mas magandang pagkakataon sa Maynila. Kalaunan, dinala s’ya ng kanyang paglalakbay sa Mariveles, Bataan, kung saan tuluyan siyang nanirahan at bumuo ng sariling pamilya.

Sa Mariveles, pinakasalan niya si Maxima Rubia, isang kilalang katutubo ng bayan. Biniyayaan sila ng limang anak: Lourdes Macatual, Flora Parro, Restituto Pacquing, Felimon Pacquing, at Domingo Pacquing. Sa paglipas ng panahon, naging bahagi si Genaro ng pamayanan at nakilala bilang isang responsable, masipag, at mapagkakatiwalaang lingkod-bayan.

Matapos ang Ikalawang Digmaang Pandaigdig, hinirang si Genaro bilang kauna-unahang postmaster ng Mariveles. Ang kanyang tahanan, na matatagpuan sa kanto ng Laya at Ricarte Streets, ang nagsilbing unang tanggapan ng koreo sa bayan.

Sa payak na tahanang ito nagsimula ang serbisyong postal ng Mariveles. Dito ipinadadala at tinatanggap ng mga mamamayan ang kanilang mga liham, balita, at mahahalagang mensahe. Sa panahong wala pang internet, cellphone, at instant messaging, ang koreo ang isa sa pinakamahalagang tulay na nag-uugnay sa mga pamilya at pamayanan.

Dahil dito, ang tahanan ni Genaro ay hindi lamang naging tirahan ng kanyang pamilya. Naging pundasyon rin ito ng isang mahalagang institusyong nagsilbi sa bayan at naging bahagi ng kasaysayang sibiko ng Mariveles.

Pumanaw si Genaro Villalobos Pacquing noong October 27, 1976, sa edad na 91. Ngunit nananatili ang kanyang pangalan at ambag sa kasaysayan ng ating bayan.

Bilang unang postmaster ng Mariveles, nag-iwan s’ya ng pamana ng katapatan, pananagutan, at tapat na paglilingkod sa bayang pinili niyang maging tahanan.

Mula Candon hanggang Mariveles, pinatunayan ni Genaro Villalobos Pacquing na hindi lamang sa lugar ng kapanganakan nasusukat ang pagiging bahagi ng isang bayan, kundi sa serbisyong inialay mo para sa mga mamamayan nito.

Mariveles Historical Society

Preserving the stories that shaped our town.

Thank you very to our Mariveles Historical Society Volunteer Nida Pacquing Almacen for the historical contribution.